ಭಾರಿ ಮಳೆಗೂ ವಿದ್ಯುತ್ ವ್ಯತ್ಯಯವಾಗದಂತೆ ಮೆಸ್ಕಾಂ (MESCOM) ಪ್ಲ್ಯಾನ್ : 489 ಸಿಬ್ಬಂದಿ, 62 ವಾಹನಗಳು ಸಜ್ಜು

ಮಂಗಳೂರು : ಮುಂಗಾರು ಹಂಗಾಮು ಆರಂಭವಾಗುತ್ತಿರುವ ಹಿನ್ನೆಲೆಯಲ್ಲಿ ವಿದ್ಯುತ್ ಸರಬರಾಜಿನಲ್ಲಿ ಉಂಟಾಗಬಹುದಾದ ಅಡಚಣೆಗಳನ್ನು ತ್ವರಿತವಾಗಿ ನಿವಾರಿಸಲು ಮೆಸ್ಕಾಂ ವ್ಯಾಪಕ ಸಿದ್ಧತೆಗಳನ್ನು ಕೈಗೊಂಡಿದೆ. ದಕ್ಷಿಣ ಕನ್ನಡ, ಉಡುಪಿ, ಶಿವಮೊಗ್ಗ ಹಾಗೂ ಚಿಕ್ಕಮಗಳೂರು ಜಿಲ್ಲೆಗಳ ವ್ಯಾಪ್ತಿಯಲ್ಲಿ ತುರ್ತು ಪರಿಸ್ಥಿತಿಗಳನ್ನು ಎದುರಿಸಲು ಒಟ್ಟು 489 ಸಿಬ್ಬಂದಿಯನ್ನು ಒಳಗೊಂಡ ವಿಶೇಷ ಕಾರ್ಯಪಡೆಯನ್ನು ರಚಿಸಲಾಗಿದೆ.

ಇದರೊಂದಿಗೆ ವಿವಿಧ ವಿಭಾಗಗಳಲ್ಲಿ ತುರ್ತು ಕಾರ್ಯಾಚರಣೆಗಾಗಿ 62 ಹೆಚ್ಚುವರಿ ವಾಹನಗಳನ್ನು ಸಿದ್ಧಗೊಳಿಸಲಾಗಿದ್ದು, ಗ್ರಾಹಕರಿಂದ ಬರುವ ಕರೆಗಳನ್ನು ನಿರ್ವಹಿಸಲು 23 ಸದಸ್ಯರ ಪ್ರತ್ಯೇಕ ತಂಡವನ್ನು ನಿಯೋಜಿಸಲಾಗಿದೆ.

ದಕ್ಷಿಣ ಕನ್ನಡ ಜಿಲ್ಲೆಯಲ್ಲಿ ಸಿದ್ಧತೆ

ಮಳೆಗಾಲದಲ್ಲಿ ವಿದ್ಯುತ್ ವ್ಯತ್ಯಯ ಉಂಟಾದರೆ ತಕ್ಷಣ ಸ್ಪಂದಿಸುವ ಉದ್ದೇಶದಿಂದ ವಿವಿಧ ವಿಭಾಗಗಳಲ್ಲಿ ಸಿಬ್ಬಂದಿ ಮತ್ತು ವಾಹನಗಳನ್ನು ನಿಯೋಜಿಸಲಾಗಿದೆ.

• ಅತ್ತಾವರ ವಿಭಾಗ – 12 ಸಿಬ್ಬಂದಿ, 6 ವಾಹನಗಳು
• ಕಾವೂರು ವಿಭಾಗ – 36 ಸಿಬ್ಬಂದಿ, 8 ವಾಹನಗಳು
• ಪುತ್ತೂರು ವಿಭಾಗ – 48 ಸಿಬ್ಬಂದಿ, 8 ವಾಹನಗಳು
• ಬಂಟ್ವಾಳ ವಿಭಾಗ – 50 ಸಿಬ್ಬಂದಿ, 7 ವಾಹನಗಳು

ಉಡುಪಿ ಜಿಲ್ಲೆಯ ವ್ಯವಸ್ಥೆ

ಉಡುಪಿ ಜಿಲ್ಲೆಯಲ್ಲಿಯೂ ತುರ್ತು ಸೇವೆಗಾಗಿ ಪ್ರತ್ಯೇಕ ಕಾರ್ಯಪಡೆ ಸಜ್ಜುಗೊಂಡಿದೆ.

• ಉಡುಪಿ ವಿಭಾಗ – 55 ಸಿಬ್ಬಂದಿ, 5 ವಾಹನಗಳು
• ಕಾರ್ಕಳ ವಿಭಾಗ – 24 ಸಿಬ್ಬಂದಿ, 4 ವಾಹನಗಳು
• ಕುಂದಾಪುರ ವಿಭಾಗ – 48 ಸಿಬ್ಬಂದಿ

ಶಿವಮೊಗ್ಗ ಜಿಲ್ಲೆಯಲ್ಲಿ ಕೈಗೊಂಡ ಕ್ರಮಗಳು

ವಿದ್ಯುತ್ ಸಂಬಂಧಿತ ಸಮಸ್ಯೆಗಳಿಗೆ ತ್ವರಿತ ಸ್ಪಂದನೆ ನೀಡಲು ವಿವಿಧ ವಿಭಾಗಗಳಲ್ಲಿ ತಂಡಗಳನ್ನು ನಿಯೋಜಿಸಲಾಗಿದೆ.

• ಶಿವಮೊಗ್ಗ ವಿಭಾಗ – 33 ಸಿಬ್ಬಂದಿ, 1 ವಾಹನ
• ಶಿಕಾರಿಪುರ ವಿಭಾಗ – 24 ಸಿಬ್ಬಂದಿ, 3 ವಾಹನಗಳು
• ಭದ್ರಾವತಿ ವಿಭಾಗ – 20 ಸಿಬ್ಬಂದಿ, 2 ವಾಹನಗಳು
• ಸಾಗರ ವಿಭಾಗ – 34 ಸಿಬ್ಬಂದಿ, 6 ವಾಹನಗಳು

ಚಿಕ್ಕಮಗಳೂರು ಜಿಲ್ಲೆಯಲ್ಲಿ ಸನ್ನದ್ಧತೆ

ಚಿಕ್ಕಮಗಳೂರು ಜಿಲ್ಲೆಯ ವಿವಿಧ ಭಾಗಗಳಲ್ಲೂ ಮುಂಗಾರು ಪೂರ್ವ ಸಿದ್ಧತೆಗಳನ್ನು ಪೂರ್ಣಗೊಳಿಸಲಾಗಿದೆ.

• ಚಿಕ್ಕಮಗಳೂರು ವಿಭಾಗ – 40 ಸಿಬ್ಬಂದಿ, 4 ವಾಹನಗಳು
• ಕೊಪ್ಪ ವಿಭಾಗ – 41 ಸಿಬ್ಬಂದಿ, 3 ವಾಹನಗಳು
• ಕಡೂರು ವಿಭಾಗ – 34 ಸಿಬ್ಬಂದಿ, 7 ವಾಹನಗಳು

ಅಪಾಯಕಾರಿ ಮರದ ಕೊಂಬೆಗಳ ತೆರವು ಕಾರ್ಯ

ವಿದ್ಯುತ್ ಲೈನ್‌ಗಳಿಗೆ ಅಡ್ಡಿಯಾಗುವ ಹಾಗೂ ಅಪಾಯ ಉಂಟುಮಾಡುವ ಮರಗಳು ಮತ್ತು ಕೊಂಬೆಗಳನ್ನು ತೆರವುಗೊಳಿಸುವ ಕಾರ್ಯ ಈಗಾಗಲೇ ಆರಂಭಗೊಂಡಿದ್ದು, ಹಲವು ಪ್ರದೇಶಗಳಲ್ಲಿ ಈ ಕೆಲಸ ಪ್ರಗತಿಯಲ್ಲಿದೆ. ಜೊತೆಗೆ ಹಾನಿಗೊಳಗಾಗಿರುವ ಅಥವಾ ಅಪಾಯಕಾರಿಯಾಗಿ ಕಂಡುಬರುವ ವಿದ್ಯುತ್ ಕಂಬಗಳು ಮತ್ತು ತಂತಿಗಳನ್ನು ದುರಸ್ತಿ ಮಾಡುವ ಕಾರ್ಯವೂ ನಡೆಯುತ್ತಿದೆ.

ಸಾರ್ವಜನಿಕರಿಗೆ ಮೆಸ್ಕಾಂ ಮನವಿ

ಮುಂಗಾರು ಪೂರ್ವ ಸಿದ್ಧತಾ ಕಾರ್ಯಗಳು ಮೆಸ್ಕಾಂ ವ್ಯಾಪ್ತಿಯ ಎಲ್ಲಾ ನಾಲ್ಕು ಜಿಲ್ಲೆಗಳಲ್ಲಿ ಆರಂಭವಾಗಿದ್ದು, ಸಂಬಂಧಿತ ಅಧಿಕಾರಿಗಳಿಗೆ ಅಗತ್ಯ ಕ್ರಮಗಳನ್ನು ಕೈಗೊಳ್ಳುವಂತೆ ಸೂಚಿಸಲಾಗಿದೆ ಎಂದು ಮೆಸ್ಕಾಂ ತಿಳಿಸಿದೆ.

ವಿದ್ಯುತ್ ಸಂಬಂಧಿತ ದೂರುಗಳಿಗಾಗಿ ಗ್ರಾಹಕರು 24×7 ಕಾರ್ಯನಿರ್ವಹಿಸುವ ಸಹಾಯವಾಣಿ ಸಂಖ್ಯೆ 1912 ಅನ್ನು ಸಂಪರ್ಕಿಸಬಹುದು. ತುರ್ತು ಹಾಗೂ ಅಪಾಯಕಾರಿ ಪರಿಸ್ಥಿತಿಗಳ ಕುರಿತು ಮಾಹಿತಿ ನೀಡಲು 8277883388 ಹಾಗೂ 0824-2950953 ಸಂಖ್ಯೆಗಳಿಗೂ ಕರೆ ಮಾಡಬಹುದು.

ಅಪಾಯಕಾರಿಯಾಗಿ ಕಂಡುಬರುವ ವಿದ್ಯುತ್ ಕಂಬಗಳು, ತಂತಿಗಳು ಅಥವಾ ಇತರೆ ವಿದ್ಯುತ್ ವ್ಯವಸ್ಥೆಗಳ ಬಗ್ಗೆ ಸಾರ್ವಜನಿಕರು ಕೂಡಲೇ ಮೆಸ್ಕಾಂಗೆ ಮಾಹಿತಿ ನೀಡುವಂತೆ ಅಧಿಕಾರಿಗಳು ಮನವಿ ಮಾಡಿದ್ದಾರೆ.

ಮತ್ತಷ್ಟು ಓದಿ

ಮಂಗಳೂರಿನಲ್ಲಿ ಸಿಸಿಬಿ ಬಿಗಿ ಕಾರ್ಯಾಚರಣೆ : 164 ಗ್ರಾಂ ಎಂಡಿಎಂಎ ಜಪ್ತಿ, ಇಬ್ಬರು ಡ್ರಗ್ ಪೆಡ್ಲರ್‌ಗಳು ಅರೆಸ್ಟ್