ಅಡುಗೆ ಎಣ್ಣೆ ಪ್ಯಾಕ್‌ಗಳಿಗೆ ಕೇಂದ್ರದ ಹೊಸ ನಿಯಮ : ಇನ್ನು ಮನಬಂದಂತೆ ಗಾತ್ರದಲ್ಲಿ ಮಾರಾಟಕ್ಕೆ ಅವಕಾಶವಿಲ್ಲ

ದೇಶದಾದ್ಯಂತ ಅಡುಗೆ ಎಣ್ಣೆ ಖರೀದಿಸುವ ಗ್ರಾಹಕರಿಗೆ ಅನುಕೂಲವಾಗುವ ಮಹತ್ವದ ನಿರ್ಧಾರವನ್ನು ಕೇಂದ್ರ ಸರ್ಕಾರ ಕೈಗೊಂಡಿದೆ. ಖಾದ್ಯ ತೈಲಗಳ ಪ್ಯಾಕೆಟ್ ಗಾತ್ರವನ್ನು ಏಕರೂಪಗೊಳಿಸುವ ಉದ್ದೇಶದಿಂದ ಕೇಂದ್ರ ಗ್ರಾಹಕ ವ್ಯವಹಾರಗಳ ಸಚಿವಾಲಯ ಹೊಸ ಮಾರ್ಗಸೂಚಿಯನ್ನು ಜಾರಿಗೊಳಿಸಿದೆ.

ಹೊಸ ನಿಯಮದ ಪ್ರಕಾರ, ಅಡುಗೆ ಎಣ್ಣೆ ತಯಾರಕರು, ಪ್ಯಾಕ್ ಮಾಡುವ ಸಂಸ್ಥೆಗಳು ಹಾಗೂ ಆಮದುದಾರರು ಇನ್ನು ಮುಂದೆ ತಮ್ಮ ಇಚ್ಛೆಯಂತೆ ಯಾವುದೇ ಗಾತ್ರ ಅಥವಾ ಪ್ರಮಾಣದಲ್ಲಿ ಎಣ್ಣೆ ಮಾರಾಟ ಮಾಡಲು ಸಾಧ್ಯವಾಗುವುದಿಲ್ಲ. ಖಾದ್ಯ ತೈಲ ಪ್ಯಾಕೇಜಿಂಗ್ ವ್ಯವಸ್ಥೆಯನ್ನು ಪ್ರಮಾಣೀಕರಿಸುವ ಉದ್ದೇಶದಿಂದ ಇಲಾಖೆಯು ತನ್ನ ಸ್ಟ್ಯಾಂಡರ್ಡ್ ಆಪರೇಟಿಂಗ್ ಪ್ರೊಸೀಜರ್ (SOP) ನಲ್ಲಿ ತಿದ್ದುಪಡಿ ಮಾಡಿದೆ.

ಗ್ರಾಹಕರಿಗೆ ಬೆಲೆ ಹೋಲಿಕೆ ಸುಲಭ

ವಿವಿಧ ಕಂಪನಿಗಳು ಹಾಗೂ ಬ್ರ್ಯಾಂಡ್‌ಗಳು ಬೇರೆಬೇರೆ ಗಾತ್ರದ ಪ್ಯಾಕೆಟ್‌ಗಳಲ್ಲಿ ಎಣ್ಣೆ ಮಾರಾಟ ಮಾಡುತ್ತಿರುವುದರಿಂದ ಗ್ರಾಹಕರಿಗೆ ಬೆಲೆ ಮತ್ತು ಪ್ರಮಾಣದ ನಿಖರ ಹೋಲಿಕೆ ಕಷ್ಟವಾಗುತ್ತಿತ್ತು. ಹೊಸ ನಿಯಮ ಜಾರಿಗೆ ಬಂದ ಬಳಿಕ ಒಂದೇ ರೀತಿಯ ಪ್ರಮಾಣದ ಪ್ಯಾಕ್‌ಗಳಲ್ಲಿ ಉತ್ಪನ್ನಗಳು ಲಭ್ಯವಾಗುವುದರಿಂದ ಗ್ರಾಹಕರು ವಿವಿಧ ಬ್ರ್ಯಾಂಡ್‌ಗಳ ದರವನ್ನು ಸುಲಭವಾಗಿ ಹೋಲಿಸಿ ಖರೀದಿ ನಿರ್ಧಾರ ಕೈಗೊಳ್ಳಬಹುದು ಎಂದು ಸಚಿವಾಲಯ ತಿಳಿಸಿದೆ.

ಮೂರು ತಿಂಗಳಲ್ಲಿ ಹೊಸ ನಿಯಮ ಜಾರಿ ಕಡ್ಡಾಯ

ಕೇಂದ್ರ ಸರ್ಕಾರ ನೀಡಿರುವ ಸೂಚನೆಯಂತೆ ಎಣ್ಣೆ ಉತ್ಪಾದಕರು, ಪ್ಯಾಕಿಂಗ್ ಸಂಸ್ಥೆಗಳು ಮತ್ತು ಆಮದುದಾರರು ಮೂರು ತಿಂಗಳೊಳಗೆ ಹೊಸ ನಿಯಮವನ್ನು ಅನುಸರಿಸಬೇಕಿದೆ. ಈ ಅವಧಿಯಲ್ಲಿ ತಮ್ಮ ಉತ್ಪನ್ನಗಳ ಪ್ಯಾಕೇಜಿಂಗ್ ವ್ಯವಸ್ಥೆಯನ್ನು ಪರಿಷ್ಕೃತ SOPಗೆ ಅನುಗುಣವಾಗಿ ಬದಲಾಯಿಸಬೇಕಾಗುತ್ತದೆ.

ಯಾವ ಗಾತ್ರದ ಪ್ಯಾಕ್‌ಗಳಲ್ಲಿ ಮಾರಾಟಕ್ಕೆ ಅವಕಾಶ?

ಪರಿಷ್ಕೃತ ನಿಯಮಗಳ ಪ್ರಕಾರ ಖಾದ್ಯ ತೈಲಗಳನ್ನು ಕೆಳಕಂಡ ಒಂಬತ್ತು ಪ್ರಮಾಣಿತ ಗಾತ್ರದ ಪ್ಯಾಕ್‌ಗಳಲ್ಲಿ ಮಾತ್ರ ಮಾರಾಟ ಮಾಡಬಹುದಾಗಿದೆ:

• 200 ಗ್ರಾಂ
• 500 ಗ್ರಾಂ
• 1 ಲೀಟರ್ / 1 ಕೆಜಿ
• 2 ಲೀಟರ್ / 2 ಕೆಜಿ
• 3 ಲೀಟರ್ / 3 ಕೆಜಿ
• 4 ಲೀಟರ್ / 4 ಕೆಜಿ
• 5 ಲೀಟರ್ / 5 ಕೆಜಿ
• 15 ಲೀಟರ್ / 15 ಕೆಜಿ
• 20 ಲೀಟರ್ / 20 ಕೆಜಿ

ಯಾವ ಯಾವ ಎಣ್ಣೆಗಳಿಗೆ ಅನ್ವಯ?

ಈ ಹೊಸ SOP ನಿಯಮವು ಹಲವು ಪ್ರಮುಖ ಖಾದ್ಯ ತೈಲಗಳಿಗೆ ಅನ್ವಯವಾಗಲಿದೆ. ಅವುಗಳೆಂದರೆ:

• ಪಾಮ್ ಆಯಿಲ್ (ತಾಳೆ ಎಣ್ಣೆ)
• ಸೋಯಾಬೀನ್ ಎಣ್ಣೆ
• ಸೂರ್ಯಕಾಂತಿ ಎಣ್ಣೆ
• ಶೇಂಗಾ ಎಣ್ಣೆ
• ಸಾಸಿವೆ ಎಣ್ಣೆ
• ಎಳ್ಳಿನ ಎಣ್ಣೆ
• ಅಕ್ಕಿ ಹೊಟ್ಟಿನ ಎಣ್ಣೆ (Rice Bran Oil)
• ಹತ್ತಿ ಬೀಜದ ಎಣ್ಣೆ
• ಜೋಳದ ಎಣ್ಣೆ

ಆದರೆ 200 ಎಂಎಲ್‌ಗಿಂತ ಕಡಿಮೆ ಪ್ರಮಾಣದ ಪ್ಯಾಕ್‌ಗಳಿಗೆ ಈ ನಿಯಮ ಅನ್ವಯಿಸುವುದಿಲ್ಲ ಎಂದು ಸಚಿವಾಲಯ ಸ್ಪಷ್ಟಪಡಿಸಿದೆ.

ಮಾರುಕಟ್ಟೆಯಲ್ಲಿ ಪಾರದರ್ಶಕತೆಗೆ ಒತ್ತು

ಖಾದ್ಯ ತೈಲ ಮಾರುಕಟ್ಟೆಯಲ್ಲಿ ಪಾರದರ್ಶಕತೆ ಹೆಚ್ಚಿಸುವುದು ಹಾಗೂ ಗ್ರಾಹಕರಿಗೆ ಸಮಾನ ಪ್ರಮಾಣದ ಆಧಾರದ ಮೇಲೆ ಬೆಲೆಗಳನ್ನು ಹೋಲಿಕೆ ಮಾಡುವ ಅವಕಾಶ ಒದಗಿಸುವುದು ಈ ಕ್ರಮದ ಪ್ರಮುಖ ಉದ್ದೇಶವಾಗಿದೆ. ಇದರಿಂದ ಗ್ರಾಹಕರಿಗೆ ಖರೀದಿ ವೇಳೆ ಹೆಚ್ಚು ಸ್ಪಷ್ಟತೆ ದೊರೆಯುವ ನಿರೀಕ್ಷೆಯಿದೆ.

ಮತ್ತಷ್ಟು ಓದಿ :

Ola, Uberಗೆ ಹೊಸ ಸವಾಲು! ಭಾರತಕ್ಕೆ ಎಂಟ್ರಿ ಕೊಟ್ಟ Green SM; ಶೀಘ್ರದಲ್ಲೇ ಬೆಂಗಳೂರಿಗೂ ಸೇವೆ?

LPG ಸಿಲಿಂಡರ್ ದರ ಏರಿಕೆ; ಕರ್ನಾಟಕದಲ್ಲೂ ಇಂದಿನಿಂದ ಹೊಸ ಬೆಲೆ ಜಾರಿ