Airport New Rules : ವಿಮಾನ ನಿಲ್ದಾಣಗಳಲ್ಲಿ ವೀಡಿಯೋ ಚಿತ್ರೀಕರಣಕ್ಕೆ ಕಟ್ಟುನಿಟ್ಟಿನ ನಿಯಮ
ವಿಮಾನ ನಿಲ್ದಾಣಗಳಲ್ಲಿ ಇನ್ಸ್ಟಾಗ್ರಾಮ್ ರೀಲ್ಸ್, ಯೂಟ್ಯೂಬ್ ವ್ಲಾಗ್ಗಳು, ಸೆಲ್ಫಿ ವಿಡಿಯೋಗಳು ಹಾಗೂ ಟ್ರಾವೆಲ್ ಕಂಟೆಂಟ್ ಸೃಷ್ಟಿಸುವವರ ಸಂಖ್ಯೆಯು ದಿನದಿಂದ ದಿನಕ್ಕೆ ಹೆಚ್ಚುತ್ತಿದೆ. ಆದರೆ ಇಂತಹ ಚಟುವಟಿಕೆಗಳಿಗೆ ಇದೀಗ ದೊಡ್ಡ ಮಟ್ಟದ ನಿರ್ಬಂಧ ಹೇರಲಾಗಿದೆ. ಕೇಂದ್ರ ನಾಗರಿಕ ವಿಮಾನಯಾನ ಮಹಾನಿರ್ದೇಶನಾಲಯ (DGCA) ಹಾಗೂ ಬ್ಯೂರೋ ಆಫ್ ಸಿವಿಲ್ ಏವಿಯೇಷನ್ ಸೆಕ್ಯುರಿಟಿ (BCAS) ಹೊಸ ಮಾರ್ಗಸೂಚಿಗಳನ್ನು ಜಾರಿಗೆ ತಂದಿದ್ದು, ವಿಮಾನ ನಿಲ್ದಾಣದ ಕೆಲವು ನಿರ್ಬಂಧಿತ ಪ್ರದೇಶಗಳಲ್ಲಿ ಅನಧಿಕೃತವಾಗಿ ಫೋಟೋ ಅಥವಾ ವೀಡಿಯೋ ಚಿತ್ರೀಕರಣ ನಡೆಸುವವರ ವಿರುದ್ಧ ಕಠಿಣ ಕ್ರಮ ಕೈಗೊಳ್ಳಲಾಗುವುದು ಎಂದು ಎಚ್ಚರಿಕೆ ನೀಡಿದೆ.
ವಿಮಾನ ನಿಲ್ದಾಣದ ಭದ್ರತಾ ವ್ಯವಸ್ಥೆ ಮತ್ತು ಕಾರ್ಯಾಚರಣೆಯ ಸೂಕ್ಷ್ಮ ಮಾಹಿತಿಗಳು ಸಾರ್ವಜನಿಕ ವಲಯಕ್ಕೆ ಸೋರಿಕೆಯಾಗದಂತೆ ತಡೆಯುವ ಉದ್ದೇಶದಿಂದ ಈ ಹೊಸ ನಿಯಮಗಳನ್ನು ಜಾರಿಗೆ ತರಲಾಗಿದೆ.
ಏನು ಬದಲಾಗಿದೆ? DGCA ಹೊಸ ನಿಯಮಗಳ ಮುಖ್ಯಾಂಶಗಳು
ಹೊಸ ಮಾರ್ಗಸೂಚಿಗಳ ಪ್ರಕಾರ, ವಿಮಾನ ನಿಲ್ದಾಣದ ಹಲವಾರು ಸೂಕ್ಷ್ಮ ಹಾಗೂ ಭದ್ರತಾ ದೃಷ್ಟಿಯಿಂದ ಪ್ರಮುಖ ಪ್ರದೇಶಗಳಲ್ಲಿ ಪೂರ್ವಾನುಮತಿ ಇಲ್ಲದೆ ಫೋಟೋ ಅಥವಾ ವೀಡಿಯೋ ತೆಗೆಯುವುದನ್ನು ನಿಷೇಧಿಸಲಾಗಿದೆ.
ಈ ನಿಯಮಗಳು ಪ್ರಯಾಣಿಕರು ಮಾತ್ರವಲ್ಲದೆ, ಸಂದರ್ಶಕರು ಹಾಗೂ ಸಾಮಾಜಿಕ ಜಾಲತಾಣ ಕಂಟೆಂಟ್ ಕ್ರಿಯೇಟರ್ಗಳಿಗೂ ಅನ್ವಯವಾಗುತ್ತವೆ.
ಈ ಪ್ರದೇಶಗಳಲ್ಲಿ ಕ್ಯಾಮೆರಾ ಬಳಕೆ ಸಂಪೂರ್ಣ ನಿಷೇಧ
ಭದ್ರತಾ ಕಾರಣಗಳಿಂದ ಕೆಳಕಂಡ ಪ್ರದೇಶಗಳಲ್ಲಿ ಯಾವುದೇ ರೀತಿಯ ಚಿತ್ರೀಕರಣ ನಡೆಸುವುದು ಕಾನೂನು ಉಲ್ಲಂಘನೆ ಎಂದು ಪರಿಗಣಿಸಲಾಗುತ್ತದೆ.
1. ಸುರಕ್ಷತಾ ತಪಾಸಣಾ ವಲಯ
ಪ್ರಯಾಣಿಕರು ಮತ್ತು ಲಗೇಜ್ಗಳ ತಪಾಸಣೆ ನಡೆಯುವ ಸ್ಥಳಗಳಲ್ಲಿ, ವಿಶೇಷವಾಗಿ CISF ಸಿಬ್ಬಂದಿ ಕಾರ್ಯನಿರ್ವಹಿಸುವ ಪ್ರದೇಶಗಳಲ್ಲಿ ವೀಡಿಯೋ ಅಥವಾ ಫೋಟೋ ತೆಗೆಯುವುದಕ್ಕೆ ಅವಕಾಶ ಇರುವುದಿಲ್ಲ.
2. ಬೋರ್ಡಿಂಗ್ ಗೇಟ್ಗಳು
ಪ್ರಯಾಣಿಕರು ವಿಮಾನಕ್ಕೆ ಹತ್ತುವ ಮೊದಲು ಕಾಯುವ ಮತ್ತು ಟಿಕೆಟ್ ಪರಿಶೀಲನೆ ನಡೆಯುವ ಪ್ರದೇಶಗಳಲ್ಲೂ ಚಿತ್ರೀಕರಣ ನಿಷೇಧಿಸಲಾಗಿದೆ.
3. ರನ್ವೇ ಮತ್ತು ಏಪ್ರನ್ ಪ್ರದೇಶ
ವಿಮಾನಗಳು ನಿಲ್ಲುವ, ಚಲಿಸುವ, ನಿರ್ವಹಣಾ ಕಾರ್ಯಗಳು ನಡೆಯುವ ಹಾಗೂ ಇಂಧನ ತುಂಬುವ ಪ್ರದೇಶಗಳಲ್ಲಿ ಯಾವುದೇ ರೀತಿಯ ವೀಡಿಯೋಗ್ರಫಿ ಮಾಡುವುದು ಅನುಮತಿಯಿಲ್ಲದೆ ಸಾಧ್ಯವಿಲ್ಲ.
4. ರನ್ವೇ ಬಸ್ಗಳು
ಟರ್ಮಿನಲ್ನಿಂದ ವಿಮಾನದವರೆಗೆ ಪ್ರಯಾಣಿಕರನ್ನು ಕರೆದೊಯ್ಯುವ ವಿಶೇಷ ಬಸ್ಗಳ ಒಳಗೆ ಮತ್ತು ಹೊರಗೆ ಚಿತ್ರೀಕರಣ ನಡೆಸುವುದನ್ನೂ ನಿಯಂತ್ರಿಸಲಾಗಿದೆ.
ಈ ಕಠಿಣ ಕ್ರಮಕ್ಕೆ ಕಾರಣವೇನು?
ವಿಮಾನ ನಿಲ್ದಾಣಗಳಲ್ಲಿ ಸಾಮಾಜಿಕ ಜಾಲತಾಣಗಳಿಗಾಗಿ ಕಂಟೆಂಟ್ ಸೃಷ್ಟಿಸುವ ಪ್ರವೃತ್ತಿ ಹೆಚ್ಚುತ್ತಿರುವ ಹಿನ್ನೆಲೆಯಲ್ಲಿ ಈ ನಿರ್ಧಾರ ಕೈಗೊಳ್ಳಲಾಗಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.
ಇತ್ತೀಚಿನ ವರ್ಷಗಳಲ್ಲಿ ಟ್ರಾವೆಲ್ ರೀಲ್ಸ್, ವ್ಲಾಗ್ಗಳು ಮತ್ತು ಶಾರ್ಟ್ ವಿಡಿಯೋಗಳ ಜನಪ್ರಿಯತೆ ಗಣನೀಯವಾಗಿ ಏರಿಕೆಯಾಗಿದೆ. ಆದರೆ ಕೆಲವು ವಿಡಿಯೋಗಳಲ್ಲಿ ವಿಮಾನ ನಿಲ್ದಾಣದ ಭದ್ರತಾ ವ್ಯವಸ್ಥೆಗಳು, ಕಾರ್ಯಾಚರಣಾ ಮೂಲಸೌಕರ್ಯಗಳು ಹಾಗೂ ಸೂಕ್ಷ್ಮ ಮಾಹಿತಿಗಳು ಅನಾಹುತವಾಗಿ ಸಾರ್ವಜನಿಕವಾಗಿ ಬಹಿರಂಗವಾಗಿರುವುದು ಅಧಿಕಾರಿಗಳ ಗಮನಕ್ಕೆ ಬಂದಿದೆ.
ಅಧಿಕಾರಿಗಳ ಪ್ರಕಾರ, ಮನರಂಜನೆ ಅಥವಾ ಸಾಮಾಜಿಕ ಜಾಲತಾಣದ ಉದ್ದೇಶಕ್ಕಾಗಿ ಮಾಡಿದ ವಿಡಿಯೋಗಳಲ್ಲೂ ಕೆಲವೊಮ್ಮೆ ಭದ್ರತಾ ಅಪಾಯಕ್ಕೆ ಕಾರಣವಾಗುವ ಮಾಹಿತಿ ಕಾಣಿಸಿಕೊಳ್ಳುವ ಸಾಧ್ಯತೆ ಇದೆ.
ನಿಯಮ ಉಲ್ಲಂಘಿಸಿದರೆ ಯಾವ ಶಿಕ್ಷೆ ಎದುರಾಗಬಹುದು?
ಹೊಸ ನಿಯಮಗಳ ಪ್ರಕಾರ, ಕೇವಲ ವಿಡಿಯೋ ಅಳಿಸುವುದರಿಂದ ಮಾತ್ರ ತಪ್ಪಿಸಿಕೊಳ್ಳಲು ಸಾಧ್ಯವಾಗುವುದಿಲ್ಲ. ಭದ್ರತಾ ಸಿಬ್ಬಂದಿಗೆ ವ್ಯಾಪಕ ಅಧಿಕಾರಗಳನ್ನು ನೀಡಲಾಗಿದ್ದು, ಕೆಳಗಿನ ಕ್ರಮಗಳನ್ನು ಕೈಗೊಳ್ಳಬಹುದು. ಅನಧಿಕೃತವಾಗಿ ರೆಕಾರ್ಡ್ ಮಾಡಿದ ವಿಡಿಯೋ ಅಥವಾ ಫೋಟೋಗಳನ್ನು ಸ್ಥಳದಲ್ಲೇ ಡಿಲೀಟ್ ಮಾಡಲು ಸೂಚಿಸಬಹುದು.ತನಿಖೆಗಾಗಿ ಬಳಸಿದ ಮೊಬೈಲ್ ಫೋನ್ ಅಥವಾ ಕ್ಯಾಮೆರಾವನ್ನು ತಾತ್ಕಾಲಿಕವಾಗಿ ವಶಪಡಿಸಿಕೊಳ್ಳುವ ಅಧಿಕಾರ ಭದ್ರತಾ ಸಿಬ್ಬಂದಿಗೆ ಇರುತ್ತದೆ.
ನಿಯಮ ಉಲ್ಲಂಘನೆಯ ಗಂಭೀರತೆಗೆ ಅನುಗುಣವಾಗಿ ಭಾರೀ ಪ್ರಮಾಣದ ದಂಡ ವಿಧಿಸುವ ಸಾಧ್ಯತೆ ಇದೆ. ಗಂಭೀರ ಉಲ್ಲಂಘನೆ ಅಥವಾ ಸಿಬ್ಬಂದಿಯೊಂದಿಗೆ ಅಶಿಸ್ತಿನ ವರ್ತನೆ ಕಂಡುಬಂದರೆ, ಪ್ರಯಾಣಿಕರನ್ನು 3 ತಿಂಗಳಿಂದ 2 ವರ್ಷಗಳವರೆಗೆ ಅಥವಾ ಅದಕ್ಕಿಂತ ಹೆಚ್ಚು ಅವಧಿಗೆ ವಿಮಾನ ಪ್ರಯಾಣದಿಂದ ನಿರ್ಬಂಧಿಸಬಹುದು. ವಿಮಾನಯಾನ ಸಂಬಂಧಿತ ಕಾಯ್ದೆಗಳಡಿ ಕ್ರಿಮಿನಲ್ ಪ್ರಕರಣ ದಾಖಲಿಸುವ ಅವಕಾಶವೂ ಇದೆ.
ಹಾಗಾದರೆ ಏನು ಚಿತ್ರೀಕರಣ ಮಾಡಬಹುದು?
ಹೊಸ ನಿಯಮಗಳು ಸಂಪೂರ್ಣವಾಗಿ ಫೋಟೋ ಅಥವಾ ವೀಡಿಯೋ ತೆಗೆಯುವುದನ್ನು ನಿಷೇಧಿಸುವುದಿಲ್ಲ.ಚೆಕ್-ಇನ್ ಹಾಲ್, ನಿರೀಕ್ಷಣಾ ಪ್ರದೇಶಗಳು ಮತ್ತು ಫುಡ್ ಕೋರ್ಟ್ಗಳಂತಹ ಸಾರ್ವಜನಿಕ ವಲಯಗಳಲ್ಲಿ ವೈಯಕ್ತಿಕ ಬಳಕೆಗೆ ಫೋಟೋ ಅಥವಾ ಸೆಲ್ಫಿ ತೆಗೆದುಕೊಳ್ಳಬಹುದು. ನಾಗರಿಕ ವಿಮಾನಗಳಲ್ಲಿ ಪ್ರಯಾಣಿಸುವ ವೇಳೆ ತಮ್ಮ ಆಸನದಿಂದ ಸಾಮಾನ್ಯ ಫೋಟೋ ಅಥವಾ ವೀಡಿಯೋ ತೆಗೆಯಬಹುದು. ಆದರೆ ಕ್ಯಾಬಿನ್ ಸಿಬ್ಬಂದಿ ಕ್ಯಾಮೆರಾ ಆಫ್ ಮಾಡಲು ಸೂಚಿಸಿದರೆ ಅದನ್ನು ಕಡ್ಡಾಯವಾಗಿ ಪಾಲಿಸಬೇಕು.
ಯಾವುದೇ ಬ್ರ್ಯಾಂಡ್, ಕಂಪನಿ, ಪ್ರೊಡಕ್ಷನ್ ಹೌಸ್ ಅಥವಾ ಇನ್ಫ್ಲುಯೆನ್ಸರ್ ವಾಣಿಜ್ಯ ಉದ್ದೇಶಕ್ಕಾಗಿ ಚಿತ್ರೀಕರಣ ನಡೆಸಲು ಬಯಸಿದರೆ, ಕನಿಷ್ಠ ಎರಡು ತಿಂಗಳ ಮುಂಚಿತವಾಗಿ EGCA ಪೋರ್ಟಲ್ ಮೂಲಕ ಅಧಿಕೃತ ಅನುಮತಿ ಪಡೆಯಬೇಕು.
ಪ್ರಯಾಣಿಕರು ಗಮನಿಸಬೇಕಾದ ಪ್ರಮುಖ ವಿಷಯ
ವಿಮಾನ ನಿಲ್ದಾಣಗಳಲ್ಲಿ ಸಾಮಾಜಿಕ ಜಾಲತಾಣಗಳಿಗಾಗಿ ವಿಡಿಯೋ ಚಿತ್ರೀಕರಣ ಮಾಡುವ ಮೊದಲು ಅದು ಅನುಮತಿತ ಪ್ರದೇಶವೇ ಎಂಬುದನ್ನು ಖಚಿತಪಡಿಸಿಕೊಳ್ಳುವುದು ಅತ್ಯಗತ್ಯ. ಅನುಮಾನ ಇದ್ದರೆ ಭದ್ರತಾ ಸಿಬ್ಬಂದಿ ಅಥವಾ ಸಂಬಂಧಿತ ಅಧಿಕಾರಿಗಳಿಂದ ಮಾಹಿತಿ ಪಡೆದು ಬಳಿಕವೇ ಕ್ಯಾಮೆರಾ ಬಳಸುವುದು ಸೂಕ್ತ.
ವೈರಲ್ ರೀಲ್ಸ್ಗಿಂತ ಪ್ರಯಾಣದ ಸುರಕ್ಷತೆ ಮತ್ತು ನಿಯಮ ಪಾಲನೆಗೆ ಆದ್ಯತೆ ನೀಡುವುದು ಭವಿಷ್ಯದಲ್ಲಿ ಅನಗತ್ಯ ಸಮಸ್ಯೆಗಳನ್ನು ತಪ್ಪಿಸಬಹುದು.
ಮತ್ತಷ್ಟು ಓದಿ
